ရပ်စောက်တွင် ကိုရင် ၅ ပါး အစာအဆိပ်သင့်ရာမှ ၂ ပါး ပျံလွန်တော်မူ

ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ကောင်းဘို့ကျေးရွာအုပ်စု၊ ရွာမကျောင်းတွင် ဇွန်လ ၁၄ ရက်က မှိုတစ်မျိုးကို စားသုံးမိရာမှ ကိုရင်ငယ် ၅ ပါး အစာအဆိပ်သင့်မှု ဖြစ်ပွားခဲ့ပြီး ၂ ပါးပျံလွန်တော်မူကာ တစ်ပါးမှာ လက်ရှိအချိန်ထိ ဆေးဝါးကုသမှု ခံယူနေရဆဲဖြစ်သည်ဟု ဇွန်လ ၂၀ ရက်က သိရသည်။



ရွာမကျောင်းမှ ကိုရင် ၅ ပါးသည် စာသင်ကျောင်းနှင့် ဘောလုံးကွင်းအနီးတွင် ဆော့ကစားနေစဉ် အလေ့ကျ ပေါက်နေသော အဖြူရောင်နှင့် အနီရောင်အစင်းပါ မှိုများကို တွေ့ရှိသဖြင့် မီးဖုတ်စားကြရာမှ ဗိုက်နာခြင်း၊ ဝမ်း လျှောခြင်းတို့ ဖြစ်ပွားပြီး ဇွန်လ ၁၅ ရက်တွင် မိုင်းအင်ဆေးရုံမှတဆင့် တောင်ကြီးမြို့၊ စဝ်စံထွန်းဆေးရုံသို့ ဆက်လက်တင်ပို့ခဲ့ရကြောင်း သိရသည်။

ထိုသို့ တင်ပို့ပြီးနောက် ဇွန်လ ၁၆ ရက်၊ ညနေပိုင်းတွင် ငွေတွင်းကျေးရွာနေ ဦးကျန်+ဒေါ်အောင်တို့၏ သား ရှင်နန္ဒ (၁၄) နှစ်သည်လည်းကောင်း၊ ဇွန်လ ၁၉ ရက်၊ နံနက်ပိုင်းတွင် ရေမည်းဆုံရွာနေ ရှင်ဣန္ဒက (၁၂) နှစ်သည်လည်း ကောင်း အသီးသီး ပျံလွန်တော်မူခဲ့ပြီး ရှင်ဩရိသ (၁၃) နှစ်နှင့် ရှင်ခေမာစာရ (၉) နှစ်တို့မှာ ပျောက်ကင်းသက်သာ ပြီး ဆေးရုံမှ ဆင်းခွင့်ရခဲ့ပြီးဖြစ်ကာ ရှင်နန္ဒိယ (၁၄) နှစ်မှာ စိတ်မချရသည့် အနေအထား ဖြစ်သဖြင့် ဇွန်လ ၂၀ ရက်အထိ ဆေးရုံတွင် တက်ရောက်ဆေးကုသမှု ခံယူနေရဆဲဖြစ်ကြောင်း သိရသည်။
.
အဆိုပါ ကိုရင်များမှာ ကောင်းဘို့ကျေးရွာအုပ်စု၊ ရွာမကျောင်း၌ သီတင်းသုံး နေထိုင်ကြပြီး ပိုပလောင် ကမ္မဋ္ဌာန်း ကျောင်းတိုက်၌ တအာင်းပလောင်စာပေ သင်ယူနေကြခြင်းဖြစ်ကြောင်း သိရသည်။
.
ကမ္ဘာပေါ်တွင် မှိုအမျိုးအစားပေါင်း ၃၈၀၀၀ ကျော်ရှိသဖြင့် စားသုံးရန်သင့်/မသင့် ခွဲခြားနိုင်ရန် ခက်ခဲပြီး အကြမ်း အားဖြင့် ရောင်စုံရှိသောမှိုများ၊ အစက်အပြောက်ပါရှိသောမှိုများ၊ အဖုအပိန့်ထနေသော မှိုများ၊ ဦးခေါင်းမှာ ထီးပုံ သဏ္ဍာန်မဟုတ်သော မှိုများ၊ ပတ်ဝန်းကျင် မသန့်ရှင်းသောနေရာတွင် ပေါက်ရောက်သောမှိုများမှာ စားသုံးရန် မသင့်သည့် မှိုအမျိုးအစားများဖြစ်ကြောင်း သိရသည်။

အဆိပ်ရှိသောမှိုကို စားသုံးမိပါက ၄ နာရီမှ ၆ နာရီအတွင်း အစာအိမ်နှင့် သွေးကြောများအတွင်းသို့ မှိုဆိပ် ရောက်ရှိသွားပြီး ဝမ်းဗိုက်မခံမရပ်နိုင်အောင် အောင့်လာခြင်း၊ ခေါင်းကိုက်ခြင်း၊ အန်ခြင်း၊ ဝမ်းမကြာခဏသွားခြင်း၊ ကိုယ်အပူချိန် မြင့်တက်လာခြင်း၊ တစ်ကိုယ်လုံး အဖုအပိန့်များ ထွက်လာခြင်းတို့ ဖြစ်ပေါ်လာပြီး အစာကုန်အောင် ပြန်မအန်နိုင်လျှင်ဖြစ်စေ ဝမ်းများများ မသွားလျှင်ဖြစ်စေ၊ သွေးထဲတွင် ပျံ့နှံ့နေသော မှိုအဆိပ်ကို ပြေအောင် မလုပ်နိုင်လျှင် ဖြစ်စေ လူနာ၏ အသက်အန္တရာယ်ကို ထိခိုက်စေနိုင်ကြောင်း သိရသည်။