အီဂျစ်နိုင်ငံ၊မြို့တော်ကိုင်ရိုအနီးမှာ ကမ္ဘာလှည့်ခရီးသွားတွေလိုက်ပါလာတဲ့ဘတ်စ်ကားဟာ အခုလ(၁၉)ရက် နေ့လည် ပိုင်းကဗုံးခွဲတိုက်ခိုက်ခံခဲ့ရတာကြောင့် လူ(၁၀)ဦးထက်မနည်း ဒဏ်ရာရရှိခဲ့ပါတယ်။ ဘတ်စ်ကားပေါ်မှာ ကမ္ဘာလှည့်ခရီးသွား(၂၅)ဦး လိုက်ပါလာပြီး၊ Grand Egyptian ပြတိုက်အနီးမှာ ဗုံးခွဲတိုက်ခိုက်ခံခဲ့ရတာပါ။ ဗုံးခွဲတိုက်ခိုက်ခံရမှုကြောင့် ဘတ်စ်ကားက ပြတင်းပေါက်မှန်တွေကွဲခဲ့ပြီး၊ အနီးနားရှိအခြားကားတွေလည်း ပျက်စီးခဲ့ပါတယ်။ ဘယ်ဖောက်ခွဲရေးပစ္စည်းကိုအသုံးပြုပြီး ဖောက်ခွဲခဲ့တာကိုတော့ မသိရသေးပါဘူး။ကနဦးစစ်ဆေးမှုတွေအရ အဝေးထိန်းခလုတ်နဲ့ဖေါက်ခွဲခဲ့တာဖြစ်နိုင်တယ်လို့ အီဂျစ်လုံခြုံရေးဌာနရဲ့ ထုတ်ပြန်ချက်အရသိရပါတယ်။ ပေါက်ကွဲမှုဖြစ်ခဲ့ပေမယ့် ပြတိုက်ကိုတော့ ထိခိုက်မှုမရှိပါဘူး။ အဲဒီပြတိုက်ကိုပြန်လည်ပြုပြင်နေဆဲဖြစ်ပြီး၊ အများပြည်သူတွေ လေ့လာနိုင်အောင် နောက်နှစ်မှာဖွင့်ပေးဖို့ ပြန်လည်ပြုပြင်နေတာဖြစ်ပါတယ်။ အခုတိုက်ခိုက်မှုနဲ့ပတ်သက်ပြီး ဘယ်အဖွဲ့အစည်းကမှ သူတို့လုပ်တာလို့ပြောကြားထားခြင်းမရှိသေးကြောင်း ရိုက်တာသတင်းမှာဖော်ပြထားပါတယ်။
No comments:
Post a Comment