မြန်မာ့ရုပ်ရှင်များ နိုင်ငံခြားတွင်သွားရောက်ပြသရုံနှင့် နိုင်ငံတကာထိုးဖောက်နေဟုပြောမရကြောင်း ဒါရိုက်တာဏကြီး သုံးသပ်

မြန်မာနိုင်ငံမှ ရုပ်ရှင်များကို နိုင်ငံခြားတွင်သွားရောက်ပြသနေသော်လည်း မြန်မာစကားမတတ်သော နိုင်ငံခြားသားများ လာကြည့်ခြင်းမဟုတ်သဖြင့် နိုင်ငံတကာထိုးဖောက်နေဟု ပြောမရကြောင်း ဒါရိုက်တာဏကြီးက သုံးသပ်ပြောဆိုလိုက်သည်။ ရန်ကုန်မြို့ရှိ Sky Star Hotel ၌ မေလ ၁၈ ရက်က ကျင်းပသည့် မြန်မာ့ရုပ်ရှင် နှစ် (၁၀၀)ပြည့်ပွဲတော် ကျင်းပရေး ပထမအကြိမ်တွေ့ ဆုံအကြံဥာဏ်ရယူခြင်းအခမ်းအနားတွင် ယခုကဲ့သို့ပြောခဲ့ခြင်းဖြစ်သည်။
“ အမှန်တိုင်းပြောရရင်တော့ ကျွန်တော်တုိ့တွေအရမ်းမပျော်စေချင်ဘူး။ ဘာလို့လဲဆိုတော့ ကျွန်တော်တို့ နိုင်ငံတကာကို သွားပြတယ်။ စင်ကာပူတို့၊ ဘန်ကောက်တို့ကိုသွားပြတယ်။ ဒါက နိုင်ငံခြားမှာနေတဲ့ မြန်မာတွေ လာကြည့်တာ။ မြန်မာစကားမပြောတတ်တဲ့ နိုင်ငံခြားသားတွေ လာကြည့်တာမဟုတ်သေးဘူး။ ဒါက မြန်မာပရိသတ်ကိုပဲပြတာပဲ။ အဲ့ဒါကြောင့် နိုင်ငံတကာသွားတာမဟုတ်သေးဘူး။

နိုင်ငံတကာသွားတယ် ဆိုတာက နိုင်ငံတစ်နိုင်ငံရဲ့ Box Office မှာ တကယ်တရားဝင်ပြီးတော့ တခြားနိုင်ငံကသူတွေကပါ မြန်မာရုပ်ရှင်တွေဝင်ကြည့်တယ်ဆိုမှ ဒါက နိုင်ငံတကာသွားတယ်လို့ဆိုတာပေါ့” ဟု ဒါရိုက်တာ ဏကြီးက ပြောသည်။ မြန်မာ့ရုပ်ရှင်နှစ် (၁၀၀) ပြည့်ပွဲတော်ကို လာမည့် ၂၀၂၀ ခုနစ်၊ ဧပြီလတွင် ကျင်းပသွားမည်ဖြစ်ကြောင်း သိရသည်။ ရန်ကုန်တိုင်းဒေသကြီးအစိုးရအနေဖြင့် ရုပ်ရှင်အဆင့်အတန်းမြှင့်တင်ရေးအတွက် ဌာနတစ်ခုအဖြစ် ပြောင်းလဲ ဆောင်ရွက်ရန် ပြင်ဆင်နေကြောင်းလည်း ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးဖြိုးမင်းသိန်းက ပြောကြားထားသေးသည်။