ရန်ကုန်မိုးပျံရထားလမ်းအတွက် မြေယာလျော်ကြေးပေးရန် စစ်တမ်းစကောက်

ရန်ကုန်မိုးပျံမြို့ပတ်ရထားလမ်းစီမံကိန်း(YUMRT)ကို ရန်ကုန် -အရှေ့အနောက်သို့ ပါရမီလမ်းကြောင်းအတိုင်း ၂၀၂၁ တွင် စတင်တည်ဆောက်သွားမည်ဖြစ်ပြီး ယင်းအတွက် မြေယာလျော်ကြေးပေးရန် ယခုလ ၆ ရက်နေ့မှ စတင်၍ စစ်တမ်းများကောက်ယူ သွားမည်ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီမှသိရသည်။


ရန်ကုန်မြို့ပြလူထု ရထားပို့ဆောင်ရေးစီမံကိန်း (YUMRT) ဆောင်ရွက်ရာတွင် ရန်ကုန်တိုင်းဒေသကြီး အစိုးရအဖွဲ့အနေဖြင့် စီမံကိန်းဧရိယာအတွင်း မြေသိမ်းဆည်းရေးနှင့် ပြန်လည်နေရာချထားရေး လုပ်ငန်းများကို အကောင်အထည်ဖော် ဆောင်ရွက်မည်ဖြစ်သောကြောင့် ပြန်လည်နေရာချထားရေး ပံ့ပိုးမှုများပေးအပ်နိုင်ရန် အတွက် ယခုလ ၆ ရက်ကို အကျုံးဝင်သည့် နောက်ဆုံးရက်စွဲ Cut-Off Date (COD)အဖြစ် တရားဝင် ထုတ်ပြန်ကြေညာထားခြင်းဖြစ်သည်။

JICA ၏ သဘာဝပတ်ဝန်းကျင်နှင့် လူမှုပတ်ဝန်းကျင် ထိခိုက်မှု ဆန်းစစ်ခြင်းမူဝါဒနှင့် နိုင်ငံတကာငွေကြေး အဖွဲ့အစည်းများမှ ချမှတ်ထားသော စံနှုန်းများနှင့်အညီ ယခုနှစ် မေလ ၆ ရက်မှ ဇွန်လ ၃၀ ရက်ကာလသည် စီမံကိန်းသက်ရောက်မည့် ဧရိယာတစ်ခုလုံးကို စစ်တမ်းကောက်ယူမည့် လျာထား ကာလဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

"မြေသိမ်းပြီးတာနဲ့ ၂၀၂၁ မှာ စပြီး တည်ဆောက်မယ် ရန်ကုန်ကို လှိုင်သာယာကနေ စပြီးတော့ ပါရမီ ကားလမ်းအတိုင်း မြို့ထဲအထိ စဆွဲမယ်။ ဒုတိယအဆင့် က ရန်ကုန် တောင်ကနေ မြောက်အထိဆွဲမယ် ဒလ အထိပေါ့။ ဘဏ္ဍာရေးသုံးစွဲမှု အပိုင်းက ခန့်မှန်းတွက်ချက်ရ အုံးမှာဆိုတော့ ဒီ ၂၀၁၉-၂၀၂၀ မှာ မြေသိမ်းမှု အနေအထားတွေက ဘယ်လိုအနေထား ရှိမလဲဆိုတာ သူတို့ မခန့်မှန်းနိုင်သေးဘူးဆိုတော့ အဲ့တာကိုကြည့်မယ်။ ဘဏ္ဍာရေးပိုင်းက JICA က ကူညီမှာဆိုတော့ ဘယ်လိုချေးမလဲဆိုတာကို အသေးစိတ် အန်ကယ်တို့ စီမံကိန်းကော်မတီကို ထပ်ပြီးတင်ပြရဦးမှာပါ"ဟု ဒဂုံမြို့နယ်၊ မဲဆန္ဒနယ် အမှတ် (၂) တိုင်းလွှတ်တော် ကိုယ်စားလှယ် ဦးကျော်ဇေယျက ပြောသည်။

ယင်းစီမံကိန်းတွင် ရန်ကုန်မြို့ အရှေ့-အနောက် ဆက်သွယ်သွားလာနိုင်မည့် ရထားလမ်းကြောင်း၏ အပိုင်း ၁ ဖြစ်သော (လှိုင်သာယာ - ပါရမီ ) လမ်းပိုင်းအရှည် ၁၈ ကီလိုမီတာကို ကနဦး တည်ဆောက်မည်ဖြစ်ပြီး လမ်းကြောင်းမှာ လှိုင်သာယာဘူတာမှစတင်ပြီး ရန်ကုန်-ပုသိမ်လမ်းအတိုင်း လှိုင်မြစ်ကို ဖြတ်ကျော်၍ ပါရမီလမ်းအတိုင်း ပါရမီဘူတာအထိ ဖြစ်ကြောင်းသိရသည်။

အဆိုပါလမ်းကြောင်းအတွက် လိုအပ်သော လမ်းအကျယ်မှာ ရန်ကုန်-ပုသိမ်လမ်းတစ်လျှောက်တွင် (၂၉)မီတာနှင့် ပါရမီလမ်းတစ်လျှောက်တွင် (၂၂)မီတာ လိုအပ်မည်ဖြစ်သည်။

ထို့ပြင် လှိုင်သာယာဘူတာ ပရဝဏ်အတွင်း ရန်ကုန်မြို့ပြလူထု ရထားပို့ဆောင်ရေးစီမံကိန်း ယာဒ်ဝင်း တည်ဆောက်ရန်အတွက် ၅၄ ဒသမ ၃၆ ဧက (၂၂)ဟတ်တာ ၊ရန်ကုန်-ပုသိမ်လမ်းတစ်လျှောက်တွင် ရထားလမ်း၏ အလယ်မျဉ်းမှ တစ်ဖက်တစ်ချက်စီ ၁၄ ဒသမ ၅ မီတာ အကျယ် ၊ ပါရမီလမ်း တစ်လျှောက်တွင် ရထားလမ်း၏ အလယ်မျဉ်းမှ တစ်ဖက်တစ်ချက်စီ (၁၁) မီတာအကျယ် တို့သည် ယင်းစီမံကိန်း ဆောင်ရွက်ရာတွင် အကျိုးသက်ရောက် မည့်နေရာများဖြစ်ကြောင်း သိရသည်။

စီမံကိန်းအကျုံးဝင်မည့် နောက်ဆုံးနေ့ ဖြစ်သော မေလ ၆ ရက် နောက်ပိုင်း အဆိုပါနယ်မြေများအတွင်း တည်ရှိနေသော အဆောက်အအုံများကို ပြုပြင်တည်ဆောက်ခြင်း ၊ တိုးချဲ့တည်ဆောက်ခြင်း ၊ အဆောက်အအုံအသစ် တည်ဆောက်ခြင်း ၊ မြေယာလွှဲပြောင်းခြင်း ၊ ရောင်းချခြင်းများအတွက် မြေယာလျော်ကြေးနှင့် ပြန်လည်နေရာချထားရေး ၊ကရုဏာကြေး ပံ့ပိုးမည့် အစီအစဉ်များ ရရှိခံစားနိုင်မည် မဟုတ်ကြောင်း ရန်ကုန်မြို့တော် စည်ပင်သာယာရေး ကော်မတီက အသိပေးကြေညာထားသည်။

၂၀၁၉-၂၀၂၀ ခုနှစ်တွင် ရထားလမ်းကြောင်းပေါ်၌ ရှိသော နိုင်ငံပိုင် မြေများနှင့် ပုဂ္ဂလိကပိုင် မြေများကို သိမ်းဆည်းမည်ဖြစ်ပြီး ၂၀၂၁ ခုနှစ်တွင် စတင် တည်ဆောက်မည်ဖြစ်ကာ စီမံကိန်းတစ်ခုလုံးမှာ ၂၀၃၅ ခုနှစ်တွင် ပြီးစီးမည်ဖြစ်သည်။

ယင်းစီမံကိန်းကို ပို့ဆောင်ရေးနှင့် ဆက်သွယ်ရေး ဝန်ကြီးဌာန ၊ရန်ကုန်တိုင်းဒေသကြီး အစိုးရနှင့် ဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေး အေဂျင်စီ (JICA)တို့က ပူးပေါင်း ဆောင်ရွက်ခြင်းဖြစ်သည်