တောင်ကြီးမြို့၊ ရေထွက်ဦးလမ်း၊ ကိုးမြို့ရှင်နတ်နန်းအနီး၊ ကျိုင်းတုံဘုန်းကြီးကျောင်းရှေ့တွင် ဇူလိုင်လ ၁၁ ရက်၊ ညပိုင်းက မော်တော်ယာဉ် တစ်စီးမှ အခြားယာဉ် ၄ စီးအား ဆင့်တိုက်မှု ဖြစ်ပွားခဲ့ကြောင်း သိရသည်။ ၂၀၁၉ ခုနှစ်၊ ဇူလိုင်လ ၁၁ ရက်၊ ည ၉ နာရီခန့်တွင် တောင်ကြီးမြို့၊ အရှေ့မြို့ပတ်လမ်းဘက်မှ ရေထွက်ဦးလမ်းသို့ အနောက်မှ အရှေ့အတိုင်း မောင်းနှင်လာသော Ford အမျိုးအစား အဖြူရောင်မော်တော်ယာဉ်သည် ကျိုင်းတုံဘုန်းကြီးကျောင်းရှေ့တွင် ရပ်နားထားသည့် မော်တော်ယာဉ် ၂ စီးအား ဦးစွာ ဝင်ရောက်တိုက်မိခဲ့ပြီးနောက် ထပ်မံ၍ အခြားမော်တော်ယာဉ် ၂ စီးအား တိုက်မိခဲ့ခြင်းဖြစ်သည်။“မနေ့ (ဇူလိုင်လ ၁၁ ရက်)ညက လမ်းဘေးမှာရပ်ထားတဲ့ ယာဉ် ၂ စီးကို အရင်တိုက်တယ်။ ပြီးတော့ ပြန်အထွက်မှာ နောက်ထပ် ၂ စီးကို ထပ်တိုက်မိတယ်။ လူထိခိုက်မှုတော့ မရှိဘူး။ Ford ကား မောင်းလာတဲ့သူကတော့ နည်းနည်း ထိခိုက်မိသွားတယ်” ဟု အမှတ် (၁၈) ယာဉ်ထိန်းရဲ ဒုတပ်ဖွဲ့ခွဲမှူးရုံးမှ တာဝန်ရှိသူတစ်ဦးက ကမ္ဘောဇတိုင်းသို့ ပြောသည်။
အဆိုပါ ယာဉ်တိုက်မှုကြောင့် မော်တော်ယာဉ်အချို့ ထိခိုက်မှု ရှိခဲ့သော်လည်း လူထိခိုက်မှု မရှိခဲ့ကြောင်းနှင့် ယာဉ် ၄ စီးအား ဝင်ရောက်တိုက်မိသည်အထိ ယာဉ်မဆင်မခြင်မောင်းနှင်သူ Ford ကား ယာဉ်မောင်းအား အရေးယူနိုင်ရေး အတွက် ဆောင်ရွက်လျက်ရှိကြောင်း သိရသည်။
No comments:
Post a Comment