၂၀၁၉ နှစ်ဆန်းပိုင်းတွင် ရန်ကုန်အိမ်ခြံမြေဈေးကွက် အရောင်းအ၀ယ်ပြန်ဖြစ်လာဟု ဆို

၂၀၁၉ ခုနှစ်ဆန်းပိုင်းတွင် ရန်ကုန်မြို့အိမ်ခြံမြေဈေးကွက် အရောင်းအ ၀ယ်ပြန်ဖြစ်လာကြောင်း imyanmar house .com မှ မန်နေဂျင်းဒါရိုက်တာဦးနေမင်းသူက ပြောသည်။ ရန်ကုန်မြို့ရှိတပ်မတော်ခန်းမတွင် မေလ ၁၀ ရက်ကကျင်းပသော အိမ်ခြံမြေအရောင်းပြပွဲတွင် သတင်းမီဒီယာများသို့ ဖြေကြားပေးခြင်းဖြစ်သည်။ “ လက်ရှိမှာအိမ်ခြံမြေဈေးကွက်က ရန်ကုန်မြို့ကိုကြည့်မယ်ဆိုရင် ၂၀၁၉ နှစ်ဆန်းပိုင်းမှာ ဈေးကွက်က ပြန်လည်လှုပ်ရှားတာကိုတွေ့ရတယ်။



၂၀၁၄ ခုနှစ်ကစပြီး အိမ်ခြံမြေဈေးကွက်ဟာ တစ်နှစ်ပြီးတစ်နှစ် ကျဆင်းလာတယ်။ ဈေးကွက်ထဲမှာလည်း ၀ယ်ယူမယ့်မိဘပြည်သူတွေက မ၀ယ်ဘဲ စောင့်ဆိုင်းနေတာတွေ ရှိတယ်။ ဒီ၂၀၁၉ နှစ်ဆန်းပိုင်းမှာတော့ ပြန်ပြီးဝယ်ယူလာတာတွေ့ရတယ်’’ ဟု imyanmar house .com မှ မန်နေဂျင်းဒါရိုက်တာ ဦးနေမင်းသူကပြောသည်။

လက်ရှိရန်ကုန်မြို့ အိမ်ခြံမြေဈေးကွက်အတွင်း စမ်းချောင်း၊ ကြည့်မြင်တိုင်တို့အပြင် ရန်ကုန်မြို့တွင်း ၆ မြို့နယ်တို့တွင် အငှားများအလုပ်ဖြစ်နေပြီး တောင်ဒဂုံ၊ မြောက်ဒဂုံ၊ လှိုင်သာယာ စသည့်မြို့နယ်များတွင် မြေကွက်အရောင်းဈေးကွက်ဖြစ်နေကြောင်း သိရသည်။

အရောင်းအ၀ယ်ဈေးကွက်တွင် ဈေးနှုန်းအားဖြင့် ငွေကျပ်သိန်းတစ်ရာကျော်မှ သိန်းနှစ်ရာ ၀န်းကျင် တိုက်ခန်းများလည်းပါဝင်ပြီး ကျပ်သိန်းသောင်းဂဏန်းရှိသောကွန်ဒိုတိုက်ခန်းများလည်း ၀ယ်ယူမှုရှိလာကြောင်း သိရသည်။