ဆိုင်ကယ်နှင့်ခရီးသည်ယာဉ်တို့အရှိန်ပြင်းစွာတိုက်မရာမှ ၁ နှစ်အရွယ်ကလေးငယ်ပါ ၃ ဦးနေရာတွင်ပွဲချင်းပြီးသေဆုံးသွားသည့် ယာဉ်တိုက်မှုဖြစ်စဉ်တစ်ခု ပဲခူးတိုင်းဒေသကြီး၊ ကျောက်တံခါးမြို့နယ်တွင်ဖြစ်ပွားကြောင်း သတင်းရရှိသည်။ ကျောက်တံခါးမြို့နယ်၊ အလယ်ကျွန်းကျေးရွာအနီး၊ တိုလိုတံတားပေါ် ရန်ကုန်-မန္တလေးသွားကားလမ်းဟောင်း မိုင်တိုင် ၁၀၁/၄-၅ ကြား၌ ယာဉ်တိုက်မှုဖြစ်စဉ်တစ်ခု ဇွန်လ ၁၄ ရက်၊ ည ၆ နာရီခွဲတွင်ဖြစ်ပွားသဖြင့် တာဝန်ရှိသူများကသွားရောက်စစ်ဆေးခဲ့ကြသည်။
စစ်ဆေးချက်အရ ယာဉ်မောင်းခန့်မှန်း ၂၈ နှစ်စိစစ်ဆဲအမျိုးသား၊ ၂၅ နှစ်စိစစ်ဆဲအမျိုးသမီးနှင့် ၁ နှစ်သားအရွယ် ကလေးငယ်တစ်ဦး စုစုပေါင်း(၃)ဦးတို့လိုက်ပါလာသည့် တရုတ်ဆိုင်ကယ်သည် ရန်ကုန်ဘက်မှမန္တဘက်သို့ဦးတည်မောင်းနှင်လာစဉ်တွင် အရှိန်မထိန်းနိုင်ဘဲတစ်ဖက်ယာဉ်ကြောသို့ လမ်းပြောင်းပြန်ရောက်ရှိသွားခဲ့သည်ဟု ရဲမှတ်တမ်းအရသိရသည်။
အခင်းဖြစ်နေရာအရောက်၌ အရှေ့လမ်းမှ လမ်းကြောင်းမှန်မောင်းနှင်လာသည့် တိုယိုတာအမျိုးအစားခရီးသည်ယာဉ်နှင့်မျက်နှာချင်းဆိုင် အရှိန်ပြင်းစွာတိုက်မိသွားခဲ့ကြခြင်းဖြစ်သဖြင့် ဆိုင်ကယ်ပေါ်ပါ ၃ ဦးစလုံးမှာ နေရာတွင်ပွဲချင်းပြီးသေဆုံးသွားခဲ့ရခြင်းဖြစ်ကြောင်း စစ်ဆေးသိရှိရသည်။
ယင်းအတွက်ကြောင့် တစ်ဖက်ယာဉ်ကြောသို့အရှိန်လွန်၍လမ်းပြောင်းပြန်မောင်းနှင်သည့် ဆိုင်ကယ်မောင်းသူ(စိစစ်ဆဲ)ကို ကျောက်တံခါးမြို့မရဲစခန်းက ရာဇသတ်ကြီးပုဒ်မ-၃၀၄(က)ဖြင့် အမှုဖွင့်လှစ် စစ်ဆေးဆောင်ရွက်လျက်ရှိကြောင်း သတင်းရရှိသည်။
No comments:
Post a Comment