မကြာမီတည်ဆောက်မည့် သန်လျင်တံတားအမှတ်(၃)၏ ကြံ့ခိုင်မှုသက်တမ်းကို မပြောနိုင်သေးဟု ဆို

ယခု ၂၀၁၉ ခုနှစ်၊ ဇူလိုင်လတွင် စတင်တည်ဆောက်မည့် သန်လျင်တံတားအမှတ်(၃)၏ ကြံ့ခိုင်မှုသက်တမ်းကို မပြောနိုင်သေးကြောင်း အဆိုပါတံတားစီမံကိန်းနှင့်ပတ်သက်၍ပြောရေးဆိုခွင့်ရှိသူ PMU Group မှ စီမံကိန်းဒါရိုက်တာ ဦးဌေးဦးက ပြောသည်။ အချိန်ကာလ ၃၂ လကြာမြင့်မည့် သန်လျင်တံတားအမှတ်(၃)ကိုဂျပန်နည်းပညာဖြင့် တည်ဆောက်သွားမည် ဖြစ်ပြီး အဆိုပါစီမံကိန်းကိုအပိုင်း ၃ ပိုင်းခွဲ၍ ဆောင်ရွက်သွားမည်ဖြစ်ကာ Phase 3 မှ စတင် ဆောင်ရွက်သွားမည် ဖြစ်ကြောင်း သိရသည်။



“ အကြိုအင်ဂျင်နီယာလုပ်ငန်းတွေတော့ စတင်ဆောင်ရွက်နေပြီ။ ဘာမှတော့ အခက်အခဲမရှိဘူး။ ပြီးတော့ ဘယ်လောက်သက်တမ်းခံမလဲဆိုတာကိုတော့ မပြောနိုင်သေးဘူး။ ဂျပန်ဘက်က ပေးခဲ့တဲ့သက်တမ်းကိုပဲ ယူရမှာပေါ့။ တံတားတစ်ခုလုံး ပြီးသွားရင်တော့ တံတားအဟောင်းကို ဆက်သုံးမလား၊ မသုံးဘူးလားဆိုတာ ဆောက်လုပ်ရေးဝန်ကြီးဌာနရဲ့မူဝါဒနဲ့ပဲ သက်ဆိုင်ပါတယ်”ဟု သံလျင်တံတားအမှတ်(၃)စီမံကိန်းနှင့် ပတ်သက်၍ပြောရေးဆိုခွင့်ရှိသူ PMU Group မှ စီမံကိန်းဒါရိုက်တာ ဦးဌေးဦးက ပြောသည်။

လက်ရှိတွင် တံတားစီမံကိန်းနှင့်ပတ်သက်၍ အကြိုအင်ဂျင်နီယာလုပ်ငန်းများ စတင်ဆောင်ရွက်နေပြီး ယခု ၂၀၁၉ ခုနှစ်၊ ဇူလိုင်လတွင် တံတားတည်ဆောက်ရေးလုပ်ငန်းများ စတင်ဆောင်ရွက်သွားမည်ဖြစ်ကာ တံတား တည်ဆောက်နေစဉ်နည်းပညာများကို မြန်မာအင်ဂျင်နီယာများထံ လက်ဆင့်ကမ်းပေးခဲ့မည်ဖြစ်ကြောင်း သိရသည်။

လက်ရှိအသုံးပြုနေသည့် သန်လျင်အမှတ်(၁) တံတားပေါ်တွင် နေ့စဉ်ယာဉ်အစီးရေ ၅၀၀၀ ဝန်းကျင် ဖြတ်သန်းသွားလျက်ရှိပြီးခံနိုင်ဝန်အားနည်းနေသည့်အတွက် ယင်းတံတားနှင့်ကပ်လျက် သန်လျင်တံတား အမှတ်(၃) တံတားသစ်တည်ဆောက်ရန် စီစဉ်ခြင်းဖြစ်ကြောင်းသိရသည်။
သန်လျင်တံတားအမှတ်(၃) တံတားသစ်တွင် ၄၄၈ မီတာရှည်သော ကြိုးဆိုင်းတံတား၊ ၁၀၃၃ မီတာရှည်သော သံဘောင်ယက်မတံတားနှင့် ၅၅၀ မီတာရှည်သော PC ယက်မတံတား စသည့် အဓိကအစိတ်အပိုင်း ၃ ခု ပါဝင်ပြီး တံတားအစိတ်အပိုင်းအားလုံး၏ စုစုပေါင်းအရှည်မှာ ၂၀၃၁ မီတာရှည်လျားမည်ဖြစ်ကြောင်း သိရသည်။