ဘန်ကောက်က ဈေးတဈေးက ရထားလမ်းပေါ် ဆောက်ထားလို့ သွားကြည့်တဲ့ ကမ္ဘာလှည့် ခရီးသည်တွေ ရှိပါတယ်။ ရထားလာချိန်မှာ ဈေးသည်တွေ ဈေးဗန်းတွေ ပြန်သိမ်းကြ၊ ရထားဖြတ်ပြီးတော့ ပြန်ခင်းကြတာကို အထူးတဆန်း အနေနဲ့ လာပြီး ဓာတ်ပုံ ရိုက်ကြတာပါ။ ဒီလိုဈေးမျိုး မြန်မာပြည်မှာ ရှိတာကိုတော့ လူသိနည်းပါတယ်။ မြန်မာနိုင်ငံ အထက်ပိုင်း မန္တလေးမြို့က သူရဲဈေးပါ။ မြန်မာဘုရင်တွေ ခေတ်က သူရဲတပ်သားတွေရဲ့ နေရပ်မှာ ဈေးဖွင့်လို့ သူရဲဈေးလို့ ခေါ်ပါတယ်။ နန်းမြို့ရိုးရဲ့ မြောက်ဘက်က ကျုံးနဲ့ မလှမ်းမကမ်းမှာ ရှိတာပါ။ အရင်က မတ္တရာသွားတဲ့ ရထားလမ်းက မန္တလေး နန်းမြို့ရိုးကို ဖြတ်သွားပါတယ်။ အခု သူရဲဈေး ဘူတာက ထွက်ပါတယ်။ဝါခေါင်လ တောင်ပြုန်းပွဲချိန်မှာ ဆိုရင် ဒီဘူတာလေးမှာ လူတိုးမပေါက်ပါဘူး။ တဖြည်းဖြည်းခုတ်တဲ့ ရထားလမ်းတလျှောက်မှာလည်း ပိုက်ဆံကြဲဖို့ တောင်းတဲ့သူတွေ ရှိသလို ရထားပေါ်မှာလည်း လူတွေ ပြည့်နေတတ်ပါတယ်။ ကျန်တဲ့အချိန်မှာတော့ လူသွားလူလာ နည်းပါတယ်။
မနက်ခင်း ဈေးစည်တဲ့အချိန်မှာ ရထားနှစ်ကြိမ်ဆိုက်ပြီး မတ္တရာက ကျေးလက်ဈေးသည်တွေ လာဈေးထွက်တတ်ပါတယ်။ သူတို့က ရေကြက်နဲ့ တခြားကျေးငှက်သားတွေ ရောင်းချတတ်လို့ မန္တလေးက လူတွေ ဈေးလာဝယ်တတ်ကြပါတယ်။ ဈေးပေါပြီး သားငါး အသီးအရွက်တွေလတ်ဆတ်လို့ သူရဲဈေးကို ဈေးဝယ်သူတွေ သဘောကျကြပါတယ်။
No comments:
Post a Comment