ပဲခူးတိုင်းဒေသကြီး၊ ပြည်မြို့နယ်တွင် NLD ပါတီဝင်အမျိုးသားတစ်ဦး ခိုက်ရန်ဖြစ်ပွားရာမှ ဓားဖြင့် အထိုးခံရကြောင်း သိရသည်။ ဖြစ်စဉ်မှာ ပြည်မြို့၊ ဖုန်းမလင်းကျေးရွာအုပ်စု၊ နန်းရွာကျေးရွာရှိစာသင်ကျောင်းရှေ့တွင် ဇွန်လ ၁၆ ရက်၊ ည ၁၁ နာရီခန့်က NLD ပါတီအဖွဲ့ဝင် ကိုကျော်ကျော်ခိုင်(၄၀)နှစ်နှင့် လူ ၃ ဦးတို့ခိုက်ရန်ဖြစ်ပွားကြရာမှ ကိုကျော်ကျော်ခိုင်မှာ ဓားဖြင့်အထိုးခံရပြီး ၀မ်းဗိုက်ထိုးသွင်းဒဏ်ရာ(၂)ချက်တို့ရရှိသွားသဖြင့် ပြည်မြို့ဆေးရုံသို့ ပို့ဆောင်ကာ အရေးပေါ်ခွဲစိတ်ပေးခဲ့ရကြောင်း သိရသည်။
“ အထိုးခံလိုက်ရတဲ့ကျော်ကျော်ခိုင်ဆိုတာက ကျွန်တော့်ညီပါ။ ခိုက်ရန်ဖြစ်ပွားတာလို့ပဲ ကျွန်တော်တို့သိရတယ်။ အခုတော့ပြစ်မှုကျူးလွန်သူတွေကိုရဲစခန်းကဖမ်းဆီးထားပြီးပြီလို့ကြားတယ်။ ဒဏ်ရာကပြင်းတယ်ဗျ။ ၀မ်းဗိုက်မှာထိုးသွင်းဒဏ်ရာကြီး ၂ ချက်အပါအ၀င်အပေါက်သေး ၃ ခုလောက်လည်းတွေ့တယ်” ဟု ပြည်မြို့၊ နန်းရွာကျေးရွာ NLD ပါတီဥက္ကဋ္ဌ ကိုသန်းဇော်ကအကုန်သိသတင်းဌာနသို့ ပြောသည်။
ယင်းဖြစ်စဉ်နှင့်ပတ်သက်၍ပြစ်မှုကျူးလွန်သူ ၃ ဦးကို ပြည်မြို့၊ အမှတ်(၁)နယ်မြေရဲစခန်း၌ အမှုဖွင့်ရန် စီစဉ်နေကြောင်း သိရသည်။
ပြီးခဲ့သည့် ဇွန်လ ၁၀ ရက်၊ နေ့လယ်ပိုင်းကလည်း ပြည်မြို့နယ် NLD ပါတီမြို့နယ်သတင်းပြန်ကြားရေးတာဝန်ခံ ဦးကျော်ကျော်ဥာဏ်ဝင်း၏လည်ပင်းကို လူငယ်တစ်ဦးကဓားဖြင့်ထိုးသွင်းသွားသဖြင့် ဆေးကုသမှုခံယူနေရဆဲ ဖြစ်ကြောင်း သိရသည်။
No comments:
Post a Comment