စင်ကာပူ နိုင်ငံမှာ အိမ်သုံး လျှပ်စစ် မီတာခတွေကို သတ်မှတ် အချိန်ကာလ တစ်ခုအတွင်း တိုးမြှင့် ကောက်ခံသွားမယ်လို့ Channel News Asia သတင်းဌာန က ဖော်ပြထားပါတယ်။ ဇူလိုင်လကနေ စက်တင်ဘာလ အတောအတွင်း အိမ်သုံး မီတာခတွေကို ၆.၄ ရာခိုင်နှုန်း တိုးမြှင့်သွားမယ်လို့ ဆိုပါတယ်။ တစ်နည်းအားဖြင့် တစ်ကီလိုဝပ် နာရီကို ၁.၄၃ ဆင့်လောက် မီတာခ ဈေးတက်သွားခြင်း ဖြစ်ပါတယ်။ ဒါဟာ ငါးနှစ်လောက် နီးပါး ကာလအတွင်း စင်ကာပူမှာ မီတာခ အမြင့်ဆုံး တက်လာခြင်းပါ။
လျှပ်စစ်ဓာတ်အား ထုတ်လုပ်မှုအတွက် လောင်စာအဖြစ် အသုံးပြုတဲ့ သဘာဝဓာတ်ငွေ့ ဈေးတက်လာတာကြောင့် အခုလို မီတာခတွေ တိုးမြှင့် သတ်မှတ်လိုက်တာလို့ စင်ကာပူ အစိုးရပိုင် ဓာတ်အား ဖြန့်ဖြူးရေးဌာန SP Groupက ပြောပါတယ်။
အိမ်သုံး မီတာခတွေဟာ လက်ရှိ တစ်ကီလိုဝပ် နာရီကို ၂၂.၇၉ ဆင့် ကျသင့်နေရာက ဇူလိုင်လ ၁ ရက်ကနေ စက်တင်ဘာ ၃၀ အတွင်းမှာ တစ်ကီလိုဝပ် နာရီကို ၂၄.၂၂ ဆင့် ကျသင့်တော့မှာ ဖြစ်ပါတယ်။
ဒါဟာ ၂၀၁၄ ခုနှစ်၊ အောက်တိုဘာလကနေ ဒီဇင်ဘာလအတွင်း သတ်မှတ်ခဲ့တဲ့ တစ်ကီလိုဝပ် နာရီကို ၂၅.၂၈ ဆင့်ဆိုတဲ့ မီတာခနောက်ပိုင်း အမြင့်ဆုံး ဖြစ်ပါတယ်။ စင်ကာပူမှာ နေအိမ်တွေဆီ သွယ်ပို့ပေးတဲ့ သဘာဝ ဓာတ်ငွေ့ ဈေးနှုန်းတွေလည်း ဇူလိုင်နဲ့ စက်တင်ဘာလကြားမှာ ၁.၆ ရာခိုင်နှုန်းလောက် မြင့်တက်လာမယ်လို့ သိရှိရပါတယ်။
No comments:
Post a Comment