ထိုင်းနိုင်ငံ အမျိုးသားအဏ္ဏဝါပန်းခြံအတွင်း SBS၏ ရုပ်သံအစီအစဉ်ရိုက်ကူးစဉ်က ရှားပါးကမာကောင်ကြီး (၃)ကောင်အားဖမ်းဆီးခဲ့သည့် တောင်ကိုရီးယားမင်းသမီး လီယွန်အွန်းမှာ ကာကွယ်ထားသည့်မျိုးစိတ်အား ဖမ်းဆီးမှုဖြင့် ထောင်ဒဏ်(၄)နှစ်အထိ ချမှတ်နိုင်သည့်ဥပဒေဖြင့် ရင်ဆိုင်နေရကြောင်း သိရသည်။ အဆိုပါ ဥယျာဉ်အတွင်း ၂၀၁၉ ခုနှစ်၊ မတ်လက ရိုက်ကူးခဲ့သည့် ရုပ်သံအစီအစဉ်တွင် မင်းသမီး လီယွန်အွန်းက ကာကွယ်ထားသည့်မျိုးစိတ်ဖြစ်သည့် ကမာကောင်ကြီး (၃)ကောင်အား ဖမ်းဆီးခဲ့ခြင်း ရိုက်ကူးရေးအဖွဲ့က ချက်ပြုတ်စားသောက်ခဲ့ကြခြင်းဖြစ်ကြောင်း သိရသည်။
အဆိုပါ ရုပ်သံအစီအစဉ်ကို ဇွန်လ (၃၀)ရက်နေ့က ထုတ်လွှင့်ခဲ့ပြီးနောက် ဟတ်ချွိုင်မိုင်အမျိုးသားဥယျာဉ်တာဝန်ရှိသူ နာရွန်ကွန်အိုက်က ဇူလိုင်လ (၃)ရက်နေ့တွင် တရားစွဲဆိုလိုက်ခြင်းဖြစ်ကြောင်း သိရသည်။
ထိုင်းနိုင်ငံ၏ တောရိုင်းတိရစ္ဆာန်ကာကွယ်ရေးဥပဒေအရ ကာကွယ်ထားသည့်ရှားပါးတိရိစ္ဆာန်များအား ဖမ်းဆီး၊ သတ်ဖြတ်၊ စားသုံးခြင်းသည် ထောင်ဒဏ် (၄)နှစ်နှင့် ဒဏ်ငွေ ဘတ် (၄၀၀၀၀)ချမှတ်နိုင်ကြောင်း သိရသည်။
ကာကွယ်ထားသည့် ရှားပါးတိရစ္ဆာန်အား ဖမ်းဆီးသည့် မင်းသမီးမှာ အဓိက တရားစွဲဆိုခံရခြင်းဖြစ်ပြီး ချက်ပြုတ်စားသောက်ရာတွင် ပါဝင်သူများမှာလည်း သက်ဆိုင်ရာဥပဒေများဖြင့် တရားစွဲဆိုခံရမည်ဖြစ်ကြောင်း သိရသည်။
တောင်ကိုရီးယားနိုင်ငံတွင် ၂၀၁၁ ခုနှစ်ကတည်းက ထုတ်လွှင့်နေသည့် The Law of the Jungle တွင် တောင်ကိုရီးယားမှ ကျော်ကြားသူများ ပါဝင်ရိုက်ကူးနေကြခြင်းဖြစ်ကြောင်း သိရသည်။
အဆိုပါအစီအစဉ်အား ထုတ်လုပ်သူဖြစ်သည့် SBS က တရားစွဲဆိုခံရမှုနှင့်ပတ်သက်၍ ဒေသဆိုင်ရာစည်းမျဉ်းဥပဒေကို သိနားလည်မှုမရှိခဲ့သဖြင့် လှိုက်လှိုက်လှဲုလှဲုတောင်းပန်ပါကြောင်းနှင့် ၎င်းတို့အနေဖြင့် နောက်ထပ်ရိုက်ကူးမှုများတွင် သတိထားဆောင်ရွက်သွားပါမည့်အကြောင်း ပြောကြားထားသည်။
ယင်းကဲ့သို့ ပြောကြားထားသော်လည်း အမျိုးသားဥယျာဉ်အတွင်းမှ ကာကွယ်ထားသည့် တိရစ္ဆာန်များအား ဖမ်းဆီးခြင်း၊ သတ်ဖြတ်ခြင်း၊ စားသောက်ခြင်းမပြုလုပ်ရကြောင်းနှင့် လိုက်နာရမည့်စည်းကမ်းချက်များကို အစီအစဉ်ထုတ်လုပ်သူအား အသိပေးထားပြီးဖြစ်သည်ဟု အမျိုးသားဥယျာဉ်တာဝန်ရှိသူက ဆိုသည်။
No comments:
Post a Comment